kisi sagar ke tat per
ek parvat kee oat mien
koi chota saa gaon basa tha
aur gaon se gujarti thee woh ek nadi
chanchal, chapal, atrapt, anchooi
sakhiyon sang jhoomti, amrit barsati
parvat peeta ke seene pe khelti
aur sagar ke hridya se ja milti
asankhya kadamon kee taal thee
aseemit jeevan ke sur the
har bhor, prkriti kee good mein jaagti
her raat, sapnaon mein kho jaati
kuch aisa tha yeh gaon
kisi kamal mein soi himgiri sa
ya koi seep mein chupa moti
kuch aisa tha yeh gaon
kheton mein log shradha bote the
akaash ummeed barsata
jeevan ke ankur phoothte
aur sasoon ko tript karte
ek oar kanak kee hariyali thee
to ek oar sarsoon kee lalima
khushaali charoon taraf lehlahati thee.............
us varsh bhee, badalon ka jamghat laga
jhinguron ne wohi raag gaye
per waqt mein sab parinit hai
akaash poora saal soona raha
jeevan kee ek matr aasha thee
woh simatati ja rahi jeevan dhaara
bhook aur majboori ke tale dabi
bhawnayein karwat badal chuki thee
sawarg ko insaan
bhookhandon mein bantne ja raha tha
bandhnein ja raha tha
swachand amrit dhaara ko
adrishya karnon, aur vikrit sidhaanton ke liye
ek oar hara, aur ek oar peela aakash baant liye gaye
baant lee gayi saagar kee ret, baant lee gayi parvat kee chaon
aur baandh diya gaya, vistaar annpoorna ka................
bhatki hui bhawnayien, badhti rahi
rishtoon ke bandhan, charmrate rahe
jakhmon se lahoo rista raha
samay ka ajgar phonkarta raha
aur dheere dheere dono oar kee faslein
us nadi ko bhulaati chali gayi
sankshipt vichaar, vyavharon mein badle
aur vyavhaar, vichaardhaaraon mien
aab, vartmaan kee karmbhoomi thee
aur itihaas ka gyaan
aab vishwaas tha parvat sa aatal
aab nishchay tha sagar se vishaal
aur the swapn....
aashcharya ko bhi aachambhit karne ke
nitye se hatne ke liye
rooyi ke khet banaye gaye
kapaas kee safed koplein
mann ko anaandit karne lagi
samay badal raha tha
sanskriti badalne lagi
per samay kee kokh
kuch aur hee dabay thee
kapaas peeli padne lagi
dharti ke pyaase hoonth phatne lage
shaktiheen jism tootate ja rahe the
nirakaar hoti aashayien dam todne ko thee................
jeevan kee jhalak bas sagaar mein dikhti thee
uski laal garbh mien bhavishya ke sapne chupe the
uski oonchi uthti lehroon mien
oosi laalima ka tej tha, bhor ka prakaash tha
shaant evam vitrit,
poora gagan ek sa tha
matmaila per pavitr
woh sagar kee lehrein
woh vicharoon kee aandhi
dono kee disha
samay ke saath badal gayi
raqtranjit aashayien
phir se besahara thee
kamzoor bhawnayien
baandh ke sahare khadi thee......................
ek aatish phir jali
umeed phir jaagi
sarsoon ke peele khet
phir se lehlahane lage
podhoon ke oat mien
podhe badhte rahe
sarsoon ke boote pedon
ka bhi paani pee gaye
hari ghaas tak peeli pad gayi
surya adivtya tej per tha
atrapt nadi, aant tak
chapatati rahi, simatati rahi
us gaon ke nishaan
baandh ke paas pade hien
samay kee ret se aaj bhi
us swarg kee gandh aati hai
parvat aaj bhi mook kkhada hai
saagar raah dekhta hai
sab prashnoon se agrim
aaj yeh yeh sab prashn karte hien
sab aashaon se uper
aaj yeh sab hamse aasha karte hien......................
